Category: நற்செய்தி

இறைவாழ்வு:
இந்தக் கேள்வியின் பதிலை அறிய,
இறைவனின் ஆவி பெறவேண்டும்.
மைந்த னிறையை யார் என்றறிய,
மனதை நாமும் தரவேண்டும்.

சொந்த இனமே சிலுவையில் கொல்ல,
சொல்வதை இன்று கேட்பவர் யார்?
அந்த நாளில் அவர் வரும்போது
அழாதிருக்க, இயேசுவைப் பார்!
ஆமென்.

நல்வாக்கு:
மத்தேயு 26:59-61.
“தலைமைக் குருக்களும், தலைமைச் சங்கத்தார் அனைவரும் இயேசுவுக்கு மரண தண்டனை விதிக்க அவருக்கு எதிராகப் பொய்ச் சாட்சி தேடினர். பல பொய்ச் சாட்சிகள் முன்வந்தும் ஏற்ற சாட்சி கிடைக்கவில்லை. இறுதியாக இருவர் முன்வந்தனர். அவர்கள், ‘ இவன் கடவுளுடைய திருக்கோவிலை இடித்து அதை மூன்று நாளில் கட்டியெழுப்ப என்னால் முடியும் என்றான் ‘ என்று கூறினார்கள்.”

நல்வாழ்வு:
புனிதரின் பணியைச் செய்பவர்கூட
பொய்ச் சான்றுரைக்க நாடுகிறார்.
இனிமை என்கிற இறைப்பணி இதனால்
இழப்பு அடையவே வாடுகிறார்.
மனிதனை மனிதன் என மதிக்காத
மடமையில் கடவுளைக் காண்பீரா?
தனிமையில் அமர்ந்து தவற்றை நினைத்து,
தந்தையின் அருளைக் கேட்பீரா?
ஆமென்.

நல்வாக்கு:
மத்தேயு 26:57-58.
தலைமைச் சங்கத்தின் முன்னிலையில் இயேசு:
“இயேசுவைப் பிடித்தவர்கள் அவரைத் தலைமைக் குரு கயபாவிடம் கூட்டிச்சென்றார்கள். அங்கே மறைநூல் அறிஞரும், மூப்பர்களும் கூடி வந்தார்கள். பேதுரு தொலைவில் அவரைப் பின்தொடர்ந்து தலைமைக் குருவின் வீட்டு முற்றம்வரை வந்து வழக்கின் முடிவைப்பற்றித் தெரிந்து கொள்வதற்காக உள்ளே நுழைந்து காவலரோடு உட்கார்ந்திருந்தார்.”

நல்வாழ்வு:
கற்றவர் என்று காட்டுகிறார்;
கயமைத்தனத்தையே கூட்டுகிறார்.
மற்றவர் தன்மையை மதியாது,
மடையர் என்று ஆட்டுகிறார்!
பெற்றது அறிவாய் இருக்குமெனில்,
பெருந் தன்மையைக் கொண்டிருப்பார்.
கொற்றவர் இறைவன் கூற்றறிந்து,
கொடுமையை நீக்கி ஆண்டிடுவார்!
ஆமென்.

நல்வாக்கு:
மத்தேயு 26:55-56.
“அவ்வேளையில் இயேசு மக்கள் கூட்டத்தைப் பார்த்து, ‘ கள்வனைப் பிடிக்க வருவதுபோல் வாள்களோடும் தடிகளோடும் என்னைக் கைதுசெய்ய வந்தது ஏன்? நான் நாள்தோறும் கோவிலில் அமர்ந்து கற்பித்துக் கொண்டிருந்தேன். நீங்கள் என்னைப் பிடிக்கவில்லையே; இறைவாக்கினர் எழுதியவை நிறைவேறவே இவையனைத்தும் நிகழ்கின்றன ‘ என்றார்.அப்பொழுது சீடர்களெல்லாரும் அவரை விட்டுவிட்டுத் தப்பி ஓடினார்கள்.”

நல்வாழ்வு:
இக்கட்டு, துன்ப வேளையிலே,
எத்தனைபேர் நம் உடனிருந்தார்?
பக்கத்தில் வந்து பார்த்தவரே,
பாய்ந்து அம்பாய்ப் பறந்துவிட்டார்!
திக்கற்று நாம் நிற்கையிலே,
தெய்வம் மட்டும் துணை வந்தார்.
எக்காலத்தும் நினைப்பீரே;
இறைவன் நம்முடன் இருக்கின்றார்!
ஆமென்.

நல்வாக்கு:
மத்தேயு 26:53-54.
“நான் என் தந்தையின் துணையை வேண்ட முடியாதென்றா நினைத்தாய்? நான் வேண்டினால் அவர் பன்னிரு பெரும் படைப் பிரிவுகளுக்கு மேற்பட்ட வானதூதரை எனக்கு அனுப்பி வைப்பாரே. அப்படியானால் இவ்வாறு நிகழவேண்டும் என்ற மறைநூல் வாக்குகள் எவ்வாறு நிறைவேறும்? ‘ என்றார்.”

நல்வாழ்வு:
இறைவாக்கு நிறைவேற
இறைமகனே வந்தார்;
நிறைவாழ்வு நாமடைய
நேர்வழியைத் தந்தார்.
குறை நீங்க விரும்பிடுவோர்
கிறித்துவுக்குள் வருவார்.
மறைவாக்கின் வெளிச்சத்தில்
மகிழ்ந்தன்பு தருவார்!
ஆமென்.

சென்னிறக் குருதி சிந்துமிவர்,
சீக்கிரம் உயிர் வாழ்வடைவதற்கு,
பொன்னிற நெஞ்சு கொண்டோரே,
புவியில் ஏழையை நினைப்பீரே!
-கெர்சோம் செல்லையா.

நல்வாக்கு:
மத்தேயு 26:51-52.
“உடனே இயேசுவோடு இருந்தவருள் ஒருவர் தமது கையை நீட்டி வாளை உருவித் தலைமைக் குருவின் பணியாளரைத் தாக்கி அவருடைய காதைத் துண்டித்தார். அப்பொழுது இயேசு அவரிடம், ‘ உனது வாளை அதன் உறையில் திரும்பப் போடு. ஏனெனில், வாளை எடுப்போர் அனைவரும் வாளால் அழிந்து போவர்.”

நல்வாழ்வு:
வாள் எடுத்துக் கொன்றவர்கள்
வாளால்தான் வீழ்ந்தார்கள்.
தோள் கொடுத்து நின்றவர்கள்
துன்பத்திலும் உயர்ந்தார்கள்.

நாள் முழுதும் கேட்பவர்கள்
நம்புகையில் வாழ்வார்கள்.
தாள் பணிந்து வேண்டுகிறேன்;
தமிழர்களே உணருங்கள்!
ஆமென்.