Author: Gershom Chelliah

பலவித தோற்றங்கள் கொடுப்பினும்,

பகிர்ந்திட படங்கள் எடுப்பினும்,

விலையறு புழுவாய் இருக்கிறேன்.

வீண் புகழ்ச்சியை வெறுக்கிறேன்.

இலை மறை காய் எனும் நல்லிறை

எனக்கு அருளிடும் சொல்லுரை,

மலைதனை பெயர்ப்பது, காணுவேன்;

மடியா அன்பினால் பேணுவேன்!

-கெர்சோம் செல்லையா

www.thetruthintamil.com

இந்த நாளில் பல்வகைக் கருத்தால்,

இயங்கும் பற்பலக் கூட்டம் போல்,

அந்த நாளிலும் யூத இனத்தினர்,

அவரைப் பிரித்து நடந்தனர்.

சொந்த இனத்தின் விடுதலை நாடி

சொல் செயலாலே வெறியூட்டி,

எந்த மீட்பும் எதிலும் பெறாமல்,

இயாலாமையிலே கிடந்தனர்!

சொல்லும் சொல்லில் ஆளுமை கண்டோர்,

சொக்கி நின்றதை நாம் கண்டோம்.

இல்லாரிடத்திலும், இருப்பார் இல்லிலும்,

இயேசு செல்வதும் நாம் கண்டோம்.

பொல்லா நோய்களும், புரியா வலிகளும்,

புறப்பட்டோடுதல் நாம் கண்டோம்.

எல்லோர் நோக்கும் இறையை நோக்கும்,

இருப்பிடம் இயேசுயெனக் கண்டோம்!

(மத்தேயு 8:1-17).

வாழ்த்துகள்!

இந்திய விடுதலை நாள் 

வாழ்த்துகள்!

பஞ்சம் பசி பிணி, பாழாக்குகிற ,

பாரதம் என்று கிடக்காமல்,

கொஞ்சம் கூட குறைவில்லாமல்,

கொழிக்கும் நாடாய் எழுக.

வஞ்சம் வைத்து, பிறரையழிக்கும்,

வல்லமை தேடி நடக்காமல், 

நெஞ்சம் நிரப்பி, வாழ வைக்கும், 

நேரிய நாட்டைத் தொழுக!

-கெர்சோம் செல்லையா. 

என்னிலத்தோர்க்கும் இறைவன் ஒருவன்;

இவரது பண்புகள் எப்படியோ?

தன்னையேயறியா மானிடன் கேட்பின்,

தருகிற பதில்கள் செப்படியோ?

விண்ணிலிருந்து வந்தவர் மைந்தன்;

விளக்கும் காட்சி காணலையோ?

மண்ணின் மகனே, இயேசுவைப் பார்ப்பாய்;

மனித வடிவிறை தோணலையோ?

(மத்தேயு: 5-7)

முன்னர் வந்த இறை வாங்கினர்கள்,

மொழிந்த முறையைப் பாருங்கள்.

இன்னிலம் மீட்க, இறைமொழிந்தாரென,

எழுதிய வாக்கியம் சேருங்கள்.

தன்னைத் தாழ்த்தும் மைந்தன் வாக்கின்,

தன்மையை பகுத்துப் பாருங்கள்.

என்னிலத்தார்களும் இதுவரை அறியா,

இயேசுவின் ஆளுமை சேருங்கள்!

(மத்தேயு :5-7)

ஏழை எளியோர் இறைவனுக்குரியோர்;

இவர்களின் தாழ்மை கற்றவராய்,

கோழை என்று புறந் துரத்தாமல்,

கொடுத்து உதவி செய்திடுவீர்.

நாளை எண்ணிக் கவலை உறாதீர்;

நடத்தும் இறையருள் பெற்றவராய்,

வேளை தோறும் வேண்டுதலினால்,

விண்ணின் அரசுள் உய்திடுவீர்!

(மத்தேயு: 5-7)

எந்த மலையென யானும் அறியேன்;

இயேசு அமர்ந்து பொழிகிறார்.

தந்தை இறையின் அரசிற்கழைத்து,

தாழ்மை நாடி மொழிகிறார்.

இந்த நாளிலும் இதுபோற் செய்தி, 

இல்லை என்றே சொல்கிறார்.

நைந்த நெஞ்சும் செம்மையாகும்,

நேர்வழி வந்தோர் வெல்கிறார்!

(மத்தேயு: 5-7)

திருடாதேயெனச் சொல்வோர் இன்று,

திருடும் காட்சி காண்கிறோம்.

அருளாளர் போல் அவரும் நின்று,

அள்ளிச் செல்வதும், காண்கிறோம்.

ஒருவரை ஒருவர் குற்றஞ்சாட்டி,

ஊரை உண்பதும், காண்கிறோம்.

இறைவ னொருவரே மெய் வழி காட்டி;

இயேசுவில் கண்டு, வேண்டுவோம்!

வாக்கால் அலகை வென்றவர் எழுந்து,

வானக அரசைத் தொடங்கினார்.

நோக்காதிருந்த கலிலெயர் விழுந்து,

நொடியில் திருந்தி அடங்கினார்.

சேர்க்காதிருக்க விழைந்தோர் மட்டும்,

செரிக்க விடாது மடங்கினார்.

தீர்க்காதிருக்கும் தீவினை கொட்டும்;

திருந்தாவிடில் அவர் முடங்குவார்!

(மத்தேயு 4:11-17)